O Centro de Saúde remodelarase para dar cabida a tres novos profesionais
Publicada o 31 de Outubro de 2007 en Sanidade
A Concellaría de Benestar, Igualdade e Sanidade comunica que, logo dunha xuntanza mantida coa directora da Área Sanitaria de Ferrol, Lourdes Buxaderas, e coa xerente de procesos, Alicia López, as dúas responsábeis do SERGAS comprometéronse a habilitar os espazos precisos para dar cabida aos tres novos profesionais de que vai dispor o Centro de Saúde xa a partir do primeiro trimestre de 2008, un médico/a, un enfermeiro/a e un enfermeiro/a a media xornada de pediatría.
Segundo informou a concelleira de Sanidade mugardesa, Anxos Díaz, as remodelacións que se efectuarán a principios do novo ano serán transitorias, até que se acometa o traslado do arquivo á planta de abaixo, onde se situarán a pediatría, a enfermaría de pediatría e a matrona. Na planta de arriba ficarán outras tres enfermarías e os catro médicos/as, e dotarase ademais o centro dun acceso á planta baixa mediante un ascensor. As responsábeis do SERGAS elevarán á Consellaría de Sanidade a proposta da configuración definitiva das instalacións para que sexa executada ao longo de 2008.
